मथुरा।उत्तर भारत की सुप्रतिष्ठित साहित्यिक संस्था श्री हिन्दी पुस्तकालय समिति, डीग (राजस्थान) दुआरा आयोजित राष्ट्रीय साहित्यिक प्रतियोगितान कै परिणाम घोषित करि दए गए हैं। इन परिणामन मैं मथुरा कै साहित्यकार अंजीव अंजुम कौ नाम विशेष रूप सौं चमकौ है। अंजीव अंजुम जू कौ “श्री सुधीर शर्मा ब्रजभाषा संस्कारणात्मक रेखाचित्र पुरस्कार” खातर चयन भयौ है।
समिति नै अपनैं 100वें स्थापना दिवस कै अवसर पै हिन्दी अरु ब्रजभाषा की नानाविध साहित्यिक विधायन मैं प्रतियोगितान कौ आयोजन करौ हतो। देश कै कौना-कौना सौं आई प्रविष्टियन कौ गम्भीर मूल्यांकन करिकैं विजेतान कै नामन की घोषणा करी गई।“ख” वर्ग मैं सम्मान संग 5100 रुपैया नकद पुरस्कार कै अंतर्गत मथुरा कै अंजीव अंजुम कूं ब्रजभाषा संस्कारणात्मक रेखाचित्र पुरस्कार प्रदान करिबौ घोषित भयौ। अंजीव अंजुम जू की या उपलब्धि सौं मथुरा, वृंदावन अरु समूचे ब्रज मंडल मैं हर्ष कौ माहौल है।
समिति कै साहित्य मंत्री एवं संयोजक सुरेन्द्र शर्मा ‘सार्थक’ नै बतायौ कै संस्था कौ ध्येय हिन्दी अरु ब्रजभाषा साहित्य कौ संरक्षण, संवर्धन अरु नव प्रतिभान कूं प्रोत्साहन दैबौ है।ब्रजभाषा साहित्य सौं जुड़ै विद्वानन नै अंजीव अंजुम जू कूं हार्दिक बधाई दैतैं कह्यौ कै या सम्मान केवल एक साहित्यकार कौ नाय, बल्कि ब्रजभाषा कै बढ़तै गौरव कौ प्रतीक है।मथुरा कै अंजीव अंजुम की या उपलब्धि ब्रजभाषा साहित्य जगत खातर गौरव अरु आनंद कौ विषय बनी है।