सरफिरा छोरा हरिपुरा री पहल, रा.उ.मा. विद्यालय हरिपुरा मं “परिंडा अभियान” रो आयोजन।
दौसा जिले रा हरिपुरा गांव मं समाज सेवा अर जीव दया रो संदेश देवता “सरफिरा छोरा हरिपुरा” संस्था री तरफ सूं राजकीय उच्च माध्यमिक विद्यालय हरिपुरा मं “परिंडा अभियान” रो आयोजन करायो गयो। घणी तेज गर्मी नै देखता संस्था रा युवावां अर विद्यालय परिवार नै मिलजुळ कै पक्षियां खातर परिंडा बांधा अर पानी री व्यवस्था करी।
कार्यक्रम दौरान संस्था रा सक्रिय सदस्य अंकित सैन, नवीन सैन राहुल महावर दीपक मीणा अर अर्पित सैन, नै बढ़-चढ़ कै भाग लियो। विद्यालय रा संजीव कुमार रावत , मुकेश कुमार मीना,उमा शर्मा , ज्योति,गोविंद महावर नै विद्यार्थियां साथे मिलकै विद्यालय परिसर मं कई जगहां पर परिंडा लगाव्या अर बालकां नै जीव-जंतु सेवा रो महत्व समझायो।
विद्यालय रा संजीव कुमार रावत नै कह्यो कि गर्मी रा दिनां मं पक्षियां नै पानी मिलणो घणो जरूरी है। अगर हर आदमी अपनै घर, खेत, दुकान अर विद्यालय मं एक-एक परिंडा बांध देवे, तो हजारां पक्षियां री जान बच सकै है। उणां विद्यार्थियां नै रोज परिंडा मं साफ पानी भरबा अर पक्षियां प्रति दया भाव राखबा रो संदेश दियो।अभियान मं विद्यालय रा विद्यार्थियां नै घणो उत्साह देखाव्यो। बालकां नै खुद अपनै हाथां सूं परिंडा बांधा अर पक्षियां खातर दाणा-पाणी री व्यवस्था करबा रो संकल्प लियो।
संस्था रा सदस्यां नै बतायो कि “परिंडा अभियान” रो मुख्य उद्देश्य समाज मं जीव दया, पर्यावरण संरक्षण अर सामाजिक जागरूकता फैलावणो है।गांव रा गणमान्य लोगां अर विद्यालय स्टाफ नै संस्था री आ पहल री सराहना करी अर म्हण्यो कि आ प्रकार रा अभियान समाज मं सकारात्मक संदेश देवै है। कार्यक्रम रो माहौल सेवा, सहयोग अर पर्यावरण प्रेम सूं भरपूर रह्यो।
